ഗ്രാമീണ വികസനം

അവലോകനം

ഭാരതത്തിലെ ഗ്രാമങ്ങൾ നിങ്ങളുടെ ശ്രദ്ധ ആവശ്യപ്പെടുകയാണ്. അടിസ്ഥാന ആവശ്യങ്ങളായ ശുചിത്വം, ശുദ്ധമായ കുടിവെള്ളം, വൈദ്യുതി, സാമ്പത്തിക അഭിവൃദ്ധി എന്നിവ മാത്രമല്ല ദീർഘകാലാടിസ്ഥാനത്തിൽ ഉള്ള മാറ്റങ്ങളാണ് അവയ്ക്ക് ആവശ്യം. ഉദാഹരണത്തിന് ശൗചാലയം ഉണ്ടാക്കിയിട്ട് ആളുകൾ അത് ഉപയോഗിക്കുന്നില്ലെങ്കിൽ എന്താണ് മാറ്റം ? സൗരോർജ്ജം ഉത്പാദിപ്പിക്കാനുള്ള സംവിധാനങ്ങൾ ചെയ്തിട്ട് അത് ഉപയോഗിക്കാനുള്ള സാഹചര്യം ഇല്ലെങ്കിൽ അത് കൊണ്ട് എന്താണ് ഗുണം ? അതുപോലെ തന്നെയാണ് ഗ്രാമത്തിൻ്റെ പ്രശ്നങ്ങളെ അഭിസംബോധന ചെയ്യാത്ത മാതൃകാപദ്ധതികളും.

മെച്ചപ്പെട്ട ജീവിത സാഹചര്യത്തിനും ജോലിക്കും വേണ്ടി ആളുകൾ ഗ്രാമങ്ങളിൽ നിന്ന് നഗരങ്ങളിലേക്ക് ചേക്കേറുന്നത് വർദ്ധിക്കുന്നതിനാൽ ഗ്രാമങ്ങളിലെ പ്രശ്നങ്ങൾ പരിഹരിക്കേണ്ടതിൻ്റെ ആവശ്യകതയും ഏറിയിരിക്കുകയാണ്. ഞങ്ങൾ വിശ്വസിക്കുന്നത് , സുസ്ഥിരമായ ഏതൊരു മാറ്റത്തിൻ്റെയും കാതൽ എന്നത് ജനങ്ങളുടെ പങ്കാളിത്തമാണെന്നാണ്. അതിനാൽ ഞങ്ങൾ ശൗചാലയങ്ങൾ നിർമ്മിക്കുമ്പോൾ ജനങ്ങളെ അതുപയോഗിക്കുന്നതിൻ്റെ ആവശ്യകതയെപ്പറ്റി ബോധവത്കരിക്കുന്നു. സൗരോർജ്ജപ്ലാൻ്റുകൾ നിർമ്മിക്കുമ്പോൾ ഗ്രാമത്തിലെ യുവജനങ്ങളെ അത് എങ്ങനെ കൈകാര്യം ചെയ്യണമെന്നും , അറ്റകുറ്റപ്പണികൾ എങ്ങനെ നടത്തണമെന്നും പരിശീലിപ്പിക്കുന്നു. മാതൃകാഗ്രാമങ്ങളെപ്പറ്റി സംസാരിക്കുമ്പോൾ അവിടത്തെ പ്രശ്നങ്ങളെ മനസ്സിലാക്കി, അവരെ മനസ്സിലാക്കുന്നവരെ മുൻനിർത്തി മാറ്റങ്ങൾക്ക് തുടക്കം കുറിക്കുന്നു.

ചുരുക്കി പറയുകയാണെങ്കിൽ, ഞങ്ങളെ സംബന്ധിച്ചിടത്തോളം, അടിസ്ഥാനസൗകര്യവികസനം എന്നത് ഗ്രാമത്തിലെ ജനങ്ങളുടെ ജീവിതനിലവാരത്തിൻ്റെ വികസനവുമായി കൈകോർത്തു പോകേണ്ട ഒന്നാണ്. ഈ ഒരു ആശയം മാതൃകയാക്കി താഴെ പറയുന്ന കാര്യങ്ങൾക്കാണ് ഞങ്ങൾ പ്രധാനമായും ഊന്നൽ കൊടുക്കുന്നത്:

• ഉൾഗ്രാമങ്ങളിൽ പോലും സൗരോർജ്ജ വിളക്കുകൾ സ്ഥാപിക്കുക
• ഗ്രാമങ്ങളിലെ യുവജനങ്ങളെയും സ്ത്രീകളെയും തൊഴിൽ പരിശീലനത്തിലൂടെ ശാക്തീകരിക്കുക.
• ശൗചാലയങ്ങളുടെ നിർമ്മാണവും അവയുടെ ഉപയോഗവും ഉറപ്പ് വരുത്തുക.
• ശുദ്ധമായ കുടിവെള്ളലഭ്യത ഉറപ്പു വരുത്തുക
• തദ്ദേശഭരണ സംവിധാനത്തെ മികവുറ്റതാക്കുക.
• ഗ്രാമങ്ങളെ സ്വയം പര്യാപ്തമാക്കുക